ထားဝယ် ရေနက်ဆိပ်ကမ်း ပြောင်းရွှေ့ရွာများ ဝန်းကျင်တွင် ရှားပါးတိရစ္ဆာန်များ တွေ့ဟုဆို

မြန်မာနိုင်ငံတွင် အထူးစီမံကိန်းအဖြစ် အကောင်အထည် ဖော်လျက်ရှိသည့် ထားဝယ် ရေနက်ဆိပ်ကမ်းအတွက် ပြောင်းရွှေ့ရမည့် နဘုလယ် ဒေသနှင့် ဘဝါရွာ အနီးတစ်ဝိုက်ရှိ တောများအတွင်း မြန်မာ့ ရှားပါးတိရစ္ဆာန်များ ဖြစ်သော ကြံ့သူတော်များနှင့် လိပ်ကြေးခေါ် (အမြီးရှည်လိပ်) များ တွေ့ရှိရကြောင်း ယင်း ရေနက်ဆိပ်ကမ်း သဘာဝပတ်ဝန်းကျင်နှင့် ပတ်သက်၍ သုတေသန ပြုလုပ်လျက် ရှိသည့် ထားဝယ် ဒေသခံများက ပြောကြားသည်။

"ဒီနှစ်ထဲ ဘဝါရွာမှာ ကြံ့သူတော် နှစ်ကောင်နဲ့ လိပ်ကြေး သုံးကောင် မိတယ်" ဟု ဒေသခံများက The Voice Weekly သို့ ပြောဆိုသည်။

ယခုနှစ် မိုးရာသီအတွင်း လိပ်ကြေးသုံးကောင်ကို ဖမ်းဆီး ရရှိခဲ့ကာ နှစ်ကောင် ပြန်လွှတ်ပေး ခဲ့ရပြီး တစ်ကောင်မှာ ပိုက်ကွန်ဖြင့် ငြိတွယ် သေဆုံးခဲ့ကြောင်း ဖမ်းဆီးရရှိသူ ဒေသခံများက ပြောကြားသည်။

အဆိုပါ နဘုလယ် ဒေသနှင့် ဘဝါရွာ အနီးတစ်ဝိုက်တွင် ကြံ့သူတော်များ၊ လိပ်ကြေးများအပြင် သင်းခွေချပ်၊ ဖွတ်၊ ပုတတ် စသည့် ရှားပါးတိရစ္ဆာန်များလည်း တွေ့နိုင်ကြောင်း ဒေသခံများထံမှ သိရသည်။

ကမ္ဘာပေါ်တွင် ကောင်ရေ သိသိသာသာ ကျဆင်းလျက် ရှိသည့် ရှားပါး ကြံ့သူတော်များသည် မြန်မာနိုင်ငံ တောင်ဘက်စွန်းရှိ တနင်္သာရီတိုင်း ဒေသကြီးတွင် အများဆုံး တွေ့ရပြီး ယခုနှစ် မတ်လ ၁ ရက်နေ့မှ စတင်ကာ တနင်္သာရီ သဘာဝ ကြိုးဝိုင်း၌ လေးလအတွင်း လေ့လာချက်အရ ကြံ့သူတော် သုံးကောင် တွေ့ရှိခဲ့ရကြောင်း စက်တင်ဘာလ ၁၉ ရက်နေ့ထုတ် The Voice Weekly Vol.7/ No.40 တွင် ဖော်ပြထားသည်။

ကမ္ဘာ့ရှားပါး ကြံ့သူတော်မှာ မြန်မာနိုင်ငံတွင် မျိုးစိတ်ပျံ့နှံ့ တည်ရှိမှု အကောင်ရေ အတိအကျ လေ့လာမှု မှတ်တမ်း မရှိသလောက် နည်းသေးကြောင်း၊ ယင်းကြောင့် တနင်္သာရီတိုင်း ဒေသကြီးတွင် လေ့လာမှုများ ပြုလုပ်သင့်ကြောင်း၊ ကြံ့သူတော်များ ကျန်ရှိနေသော ဒေသများကို ဆက်လက် လေ့လာရန် လိုအပ်နေကြောင်း သဘာဝဝန်းကျင်နှင့် သားငှက် တိရစ္ဆာန် ထိန်းသိမ်းရေးဌာနမှ တာဝန်ရှိသူ တစ်ဦးက ပြောကြားသည်။

အဆိုပါ ထားဝယ် ရေနက်ဆိပ်ကမ်း တည်ဆောက်မည့် နဘုလယ် ဒေသသည် ထားဝယ်ဒေသ၏ ယဉ်ကျေးမှု စတင် ဖြစ်ထွန်းရာ ဖြစ်ပြီး သဘာဝ စိမ့်တောများ၊ ဒီရေတောများ တည်ရှိနေသေးကြောင်း ထားဝယ် ရေနက်ဆိပ်ကမ်း သဘာဝပတ်ဝန်းကျင်အပေါ် ထိုင်းသဘာဝ ပတ်ဝန်းကျင် ထိန်းသိမ်းရေးသမား တစ်ဦးက ဆိုသည်။

အဆိုပါ ထားဝယ် ရေနက်ဆိပ်ကမ်းအတွက် ရေဖြူမြို့နယ်မှ ငါးရွာ၊ လောင်းလုံးမြို့နယ်မှ တစ်ရွာတို့ ပြောင်းရွှေ့ပေးရမည် ဖြစ်ပြီး အဆိုပါရွာများကို ဘဝါရွာတွင် ပြန်လည် နေရာချ ရွာသစ်တည်ဆောက်မည် ဖြစ်ကြောင်း ထားဝယ်ရေနက်ဆိပ်ကမ်း စီမံကိန်း အထောက်အကူပြု အဖွဲ့၏ စာရင်းများအရ သိရသည်။

အဆိုပါ ထားဝယ် ရေနက်ဆိပ်ကမ်း စီမံကိန်း သဘာဝပတ်ဝန်းကျင် ထိခိုက်မှု အစီရင်ခံစာနှင့် လူမှုရေး ထိခိုက်မှု အစီရင်ခံစာများ ပြီးစီးပါက ပြည်သူလူထုထံ အသိပေးမည် ဖြစ်ပြီး ယင်းစီမံကိန်းသည် လူထုနှင့် သဘာဝ ပတ်ဝန်းကျင်အပေါ် ထိခိုက်မှုများပါက ဆက်လက် လုပ်ဆောင်မည် မဟုတ်ကြောင်း ထားဝယ်စီမံကိန်း အထောက်အကူပြုအဖွဲ့ ဥက္ကဋ္ဌ ဦးတင်မောင်ဆွေက The Voice Weekly သတင်းထောက်နှင့် တွေ့ဆုံစဉ် ပြောကြားခဲ့သည်။

The Voice Weekly မှ ကူးယူဖေါ်ပြသည်။