Apple

ကုမ္ပဏီအမည်ပေးဖို့ Steve Job တစ်ယောက် သုံးလတိုင်တိုင် စဉ်းစားမရခဲ့ပါဘူး။ စီးပွားရေးလုပ်ငန်းကြီးတစ်ခုလည်း ဖြစ်လာစေချင်တယ်။ ကုမ္ပဏီအသစ်လည်း ဖြစ်နေတယ်။ ဖြစ်ချင်တော့ ကုမ္ပဏီရယ်လို့ တည်ထောင်ဖွဲ့စည်းပြီးခဲ့ပြီ။ တရားဝင် စာရွက်စာတမ်းတွေနဲ့တကွ ရုံးဌာနတွေကို မလျှောက်ရသေးတာသာ ရှိတာ ဝန်ထမ်းတွေလည်း ခန့်အပ်ထားခဲ့ပြီ။ ဒါပေမယ့် နာမည်ကလည်း စဉ်းစားမရ။ အဲဒီလိုနဲ့နေရင်း တစ်နေ့တော့ သူ့ဝန်ထမ်းကို ခေါ်ပြီးပြောတယ်။ တကယ်လို့ ဒီနေ့ ငါးနာရီမှာ ကျွန်တော့်ကို အကောင်းဆုံး အမည်ပေးနိုင်တဲ့လူရှိရင် အဲဒီနာမည်နဲ့ ကျွန်တော်လိုင်စင်လျှောက်လိုက်တော့မယ်ဗျာ။

ဒါပေမယ့် ကံဆိုးချင်တော့ ညနေ ငါးနာရီသာ ထိုးသွားရော။ ဘယ် လူတစ်ယောက်ကြောင်တစ်မြီးကမှ သူလိုချင်တဲ့အကောင်းဆုံးအမည်ကို စဉ်းစားမပေးနိုင်ခဲ့ဘူး။

အဲဒီအချိန်မှာ နာမည်လာပေးနိုး လာပေးနိုးနဲ့ စတိဗ်ဂျော့ဘ်တစ်ယောက် 'ပန်းသီး' တစ်လုံးကို ထိုင်စားရင်း စောင့်နေခဲ့တယ်။ ကံကောင်းချငတော့ သူ့ကုမ္ပဏီအတွက် အကောင်းဆုံးအမည်ကို စဉ်းစားလို့ ရသွားခဲ့တယ်။ အဲဒီမှာ 'Apple' ဖြစ်လာခဲ့တယ်။

အပြည့်အစုံသို့

ကွန်ပျူတာဟာ အထီးလား၊ အမလား.....

အထီးဖြစ်နိုင်တဲ့ အကြောင်းအရင်း

- သံသယဖြစ်လောက်စရာ အချက်အလက်တွေ အများအပြား ရှိနေတယ်။ ဒါပေမယ့် သဲလွန်စ ရှာမတွေ့ဘူး။
- ပြဿနာတွေကို ကူညီဖြေရှင်းပေးတယ်။ ဒါပေမယ့် အဲဒီအကူအညီတွေက ပြဿနာတွေ ဖြစ်နေပြန်တယ်။
- ပစ္စည်းအသစ်ကောင်းကောင်းလေး တပ်ဆင်ခါစမှာ အမိန့်ကို ကျိုးနွံ နာခံတတ်တယ်။ အဲ….. ပြီးရင်တော့ ပစ္စည်းအသစ် ကောင်းကောင်းလေးကို ပြန်လည်တောင်းဆိုပြန်လေရော…။
- သူတို့ရဲ့ အာရုံစူးစိုက်မှုရရှိဖို့ ဇက်ကြိုးနာနာ တင်းပေးဖို့ လိုတယ်။ သူတို့ဟာ အာရုံတွေ ထွေပြားနေတတ်ကြတယ်။
- ညတွေမှာ သိမ်မွေ့စွာ အားကြီးနေတတ်သည်။ မီးပလပ်ကြိုးကို ဖြုတ်ပြီး အနားပေးထားတာတောင် ပင်လယ်လှိုင်းလုံးတွေကို တအိအိနဲ့ စွမ်းအားပြည့်နေတတ်တယ်။

အမဖြစ်နိုင်တဲ့ အကြောင်းအရင်း

- အတွင်းပိုင်းစိတ်သဘောထားကို နားလည်တဲ့ လူတစ်ယောက်မှ မရှိဘူး။ ဖန်တီးသူတွေ ကိုယ်တိုင်တောင် နားမလည်ဘူး။
- လူတွေသဘောမပေါက်နိုင်တဲ့ ဘာသာစကားတွေ သုံးစွဲပြီး တခြားကွန်ပျူတာတွေနဲ့ ဆက်သွယ်တတ်လေ့ရှိတယ်။
- အမိန့် မှားယွင်းပေးမိရင် 'မင်းလုပ်တာ ငါရူးသွားပြီ။ ဒါပေမယ့် အဲဒါကို ငါ…… ဘယ်တော့မှ ပြောမှာ မဟုတ်ဘူး' ဆိုတဲ့ အဓိပ္ပါယ်နှစ်ခွ စကားတွေကို ပြောတတ်ကြတယ်။
- တကယ်သေးဖွဲ့တဲ့ အမှားအယွင်းကလေးတစ်ခုပဲရှိတာ တောင် နှစ်ရှည်လများ သိမ်းဆည်းထားတတ်တယ်။
- သူတို့ကို တာဝန်စယူလိုက်ပြီဆိုတာနဲ့ ယုယမှုပေးရတော့ မယ်။ အချိန်ပေးရတော့မယ်။ ငွေကုန်ရတော့မယ်။ ပစ္စည်းတွေ ဝယ်ပေးရတော့မယ်။

အပြည့်အစုံသို့

မင်းမရှိတဲ့အခါ

အတိတ်ဆိုတာ
ပြန်လည်တူးဖော်ယူလို့ရခဲ့ရင်
မင်းနဲ့အတူ ရှိခွင့်ရတဲ့
အချိန်တွေကို
ပြန်လည်ပိုင်ဆိုင်ချင်ပါတယ်။

မင်းနဲ့ဝေးသွားခဲ့ပေမယ့်
မင်းရဲ့အရိပ်ကလေးကတော့
ကိုယ့်ရင်ထဲမှာ
ထာဝရမပျောက်ကွယ်ဘဲ
ရှိနေမှာပါ။

အချစ်ဆိုတာကို
ခွဲခွာခါနီးမှာ သိလိုက်ရတော့
ကိုယ့်အတွက် ခံစားမှုက
ရင်နှင့်အမျှဆိုတာ
မင်းတစ်ယောက် သိနိုင်ပါ့မလား။

မင်းမရှိတော့တဲ့
နေရာဟောင်းလေးမှာ
မင်းထားခဲ့တဲ့
လွမ်းဆွတ်မှုတွေနဲ့
အားလုံးက ကိုယ်အတွက်တော့
အချိန်တိုင်း သတိရစရာတွေပါ။

ရင်ထဲက မပြောဖြစ်ခဲ့တဲ့
စကားတစ်ခွန်းအတွက်
မင်းကြားနိုင်ခွင့်ရှိမယ်ဆိုရင်
ကိုယ်တိုးတိုးလေး ပြောလိုက်ချင်ပါတယ်
"ကိုယ်မင်းကို သိပ်ချစ်တယ်"

KZML
(အဲဒီကဗျာလေးကိုတော့ ဒီနေရာမှ ကူးယူတင်ပြထားပါတယ်)

အပြည့်အစုံသို့

သို့..............

ရင်မှာတိတ်တခိုး ခံစားစိတ်နဲ့
အချစ်များကို ဖွင့်ပြောမည်ကြံ
ခင်မင်မှုစည်းခြားထားလေတော့
ရင်မှာသိုဝှက် မျိုသိပ်လျက်
နှောင်တွယ်ရစ်ငင် သံယောဇဉ်တွေ
တဖြည်းဖြည်းတိုး စိတ်မှာစိုးမိုး
တစ်နေ့မှမေ့မရ ငါ့ရဲ့ဘ၀
ဝေဒနာကိုပြေရာပြေကြောင်း
ဘုရားမြတ်ထံတောင်းဆုပန်မယ်
အဖြူရောင်အသည်း မပြောင်းလဲဘဲ
ဒီအတိုင်းပဲကောင်းပါတယ်………

zattlike

အပြည့်အစုံသို့

၁၉ ဂျူလိုင်သို့

၁၉ ဂျူလိုင်
ဘယ်မှာမေ့နိုင်မှာတုန်း
တို့တွေရဲ့ ကြမ္မာနတ်ဆိုး
ဂျူလိုင်မိုးစက်တွေနဲ့အတူ
အဲ့ဒီနေ့ကစရောက်လာခဲ့တော့
ဒီသမိုင်း အရိုင်းဖြစ်
အားလုံးသွတ်ချာပါဒ မီးလောင်
တို့ပြည်သူခမျာ ငိုကျွေးနေခဲ့ရ
အဲ့ဒီနေ့ကစလို့ (၆၁) နှစ်တိုင်ခဲ့ပြီ
အာဇာနည် အဘတို့ရေ။ ။

သခင်အောင်ဆန်း
သခင်… သခင်… သခင်
သခင်များလက်နဲ့ရေးခဲ့တဲ့သမိုင်း
အာဏာရူးတို့ ခြေနဲ့ဖျက်လို့
တို့ပြည်သူဘဝ
စစ်ကျွန်ဘဝရောက်ခဲ့ရပြီလေ။ ။

ဗိုလ်ချုပ်ရေ….
ဗိုလ်ချုပ်ရေ…..
ဗိုလ်ချုပ်ရေ….. လို့
တကြော်ကြော်
ရင်ထဲက အော်ခေါ်ရင်း
ဒီ အဓမ္မလှိုင်းတွေအောက်
တို့တွေ ဘဝလုကူးခတ်နေခဲ့ရတာ
ဖတ်ဖတ်ကိုမော လုံးပါးပါးလို့
အသက်ဝအောင်တောင် မရှူနိုင်ကြတော့ပေ။ ။

(အို)
“ဗိုလ်ချုပ်အောင်ဆန်းနှင့်တကွ
အာဇာနည်ခေါင်းဆောင်ကြီးများ
သားခွပ်ဒေါင်းပျိုတို့အား
အမှန်ဆုံး အမြန်ဆုံးနဲ့
မြန်မာ့သမိုင်း တခေတ်ဆန်းအောင်
အလင်းရောင် ခွန်အားများပေး
လမ်းပြကြပါခင်ဗျာ”

ရဲဝင့်သူ

အပြည့်အစုံသို့

အတ္တမှန်တစ်ချပ် ဖြတ်ကနဲကွဲပြန့်ချိန်

လူတွေကို ငါမယုံဘူး
ငါ့ကိုငါမယုံတာ ပိုခက်တယ်၊
ငါမှန်မကြည့်ရဲဘူး
မှန်တစ်ချပ်
ငါ့....ကြောင့်....
အထိတ်တလန့်ဖြစ်သွားမှာ
ကြောက်...တယ်။

ကောင်းတာတွေမှလိုချင်တတ်တဲ့
ငါ့ရဲ့အကောင်းမြင်စိတ်ဓါတ်ကို
ငါမမြင်ခဲ့မိဘူး သူငယ်ချင်း။

ငါ့အတွေးနဲ့ငါ
ငါခံစားမိသမျှတွေ
ငါရေးချင်ရာရေး
မကြိုက်ဘူးပြောရင်
ငါ့စိတ်ထဲမှာ
စာတစ်ပုဒ်ရဲ့အကြောင်း
ဘယ်လောက်သိသလဲ။

စာတစ်ပုဒ်ကိုဖန်တီးရတာ
ဘယ်လောက်ခက်သလဲ
ပြန်ပြောမိတယ် သူငယ်ချင်း။

ဖြစ်နေတာတွေဟာ
အမှန်တရားတွေဘဲ
လိုချင်တာမရတာ
ငါ့အရည်အချင်းဘဲ
ငါမမြင်နိုင်ဘူး။

လော...က...ကြီး....ကို....သာ
တစောင်းမြင်မိတယ်သူငယ်ချင်း။
ငါထမင်းငတ်ခဲ့ဘူးတယ်
ငါအိပ်ရေးပျက်ခဲ့ဘူးတယ်။

အခု
ငါထမင်းငတ်မှာ ကြောက်တယ်
ငါအိပ်ရေးပျက်မှာ ကြောက်တယ်
ငါအဲယားကွန်းပျက်မှာ ကြောက်တယ်
ငါပင်ပန်းတဲ့ အလုပ်ကိုကြောက်တယ်
ငါအင်တာနက်ကို ချစ်တယ်
ငါကွန်ပြူတာကို စွဲလန်းတယ်
ငါဒေါ်လာကို တမ်းတတယ်
ငါစတိုင်ဘောင်းဘီကို ကြိုက်တယ်
ငါမိန်းမလှလေးတွေကို မြတ်နိုးတတ်တယ်။

မဲညစ်နေတဲ့ ငါ့ကိုယ်ကြီးကို
သက်တန့်ရောင်စုံတွေတောင်
လက်မှိုင်ချသွားတယ်။

တိမ်ဖြူဖြူတွေကြားငါဖြတ်သွားလဲ
ငါ့ခန္ဓာကိုယ်ကြီးတောက်ပမလာဘူး။

မိုးတိမ်တွေကြားငါဖြတ်သွားလဲ
ငါ့ခန္ဓာကိုယ်ကြီးသန့်ရှင်းမလာဘူး။

ကမ္ဘာလုံးကြီးကို ဆပ်ပြာတစ်လုံးအလား
ငါ့ကိုယ်ပေါ်ခပ်ကြမ်းကြမ်းပွတ်တိုက်လည်း
ဘာမှထူးမလာဘူး သူငယ်ချင်း။

ငါမှန်မကြည့်ရဲဘူး
မှန်ထဲမှာငါ့အရ်ိပ်
မည်းနက်သိပ်သည်းနေလိမ့်မယ်။

Ko Ko Gyi

အပြည့်အစုံသို့

မင်းတစ်ယောက်တည်း

အချိန်တိုင်း စက္ကန့်တိုင်း မဟုတ်ပေမယ့်
နေ့တစ်နေ့ရဲ့ အစိတ်အပိုင်း အတော်များများမှာ
မင်းကိုသတိရနေမိတယ်။

ငါ့ရဲ့မျှော်လင့်ခြင်းနဲ့ လိုအပ်ခြင်းဟာလဲ
မင်းတစ်ယောက်တည်းပါ။

မင်းမရှိရင် မနေနိုင်တာ မဟုတ်ပေမယ့်
ငါမနေတတ်ဘူးဆိုတာ ၀န်ခံပါတယ် ချစ်သူ
တိုက်ဆိုင်မှုမရှိဘဲ သတိရခဲ့တာ
မင်းကလွဲလို့ ဘယ်သူမှ မရှိခဲ့ပါဘူး။

မင်းနဲ့တွေ့မှ နိုးထလာတဲ့ ငါ့နှလုံးသား
မင်းရဲ့အချစ်နဲ့ နိုးထခွင့်ပြုပါ။

zattlike

အပြည့်အစုံသို့

တန်ဖိုး

ကျွန်မထင်တာ လူ့ဘ၀ပာာ မီးပုံးပျံတစ်ခုလိုပါပဲ။ တချိန်ကျရင် မီးလောင်ပြီး ပျောက်ဆုံးသွားမယ် ဆိုတာသိရက်နဲ့ လည်း မီးပုံးပျံကို လွတ်တင်တဲ့ သူတွေပာာ သူတို့ရဲ့ မီးပုံးပျံတွေကို အမြင့်တကာ့ အမြင့်ဆုံးကို လှလှပပလေး ရောက်ပြီးမှ ပေါက်ကွဲ ပျက်စီးစေချင်ကြတာပါ။ အဲ့ဒီလိုပါပဲ လူတွေပာာလည်း တနေ့သေကြရမယ်ဆိုတာ သိနေပေမယ့်လည်း ကိုယ်အသက်ရှင်နေသေးသရွေ့ ဘ၀ရဲ့ အအောင်မြင်နိုင်ဆုံး ထိပ်ဆုံးကို ရောက်ပြီးမှ သေဆုံးသွားရရင် ပိုမကောင်းဘူးလား။ မီးပုံးပျံပာာ ပိာုးအမြင့်ကြီးကို လှလှပပလေး ရောက်ပြီးမှ ပေါက်ကွဲသွားခဲ့ ရင်တောင်မှ အဲ့ဒီမီးပုံးပျံရဲ့ နာမည်နဲ့ ပြုလုပ်သူနာမည်ပာာ လူတိုင်းရင်ထဲမှာ ကျန်နေခဲ့မှာပါ။ အရည်အချင်း ပြည့်တဲ့ တန်ဖိုးရှိတဲ့ လူတစ်ယောက် လူ့ဘ၀ထဲက အပြီးအပိုင် ထွက်သွားဦးတော့ အဲ့ဒီလူရဲ့ မိဘ၊ ညီအကို ဆွေမျိုး အသိုင်းအဝိုင်းနဲ့ အဲ့ဒီလူကိုယ်တိုင်ရဲ့နာမည်ပာာ လူတွေရဲ့ ရင်ထဲမှာ ကျန်ခဲ့ဦးမှာပါ။ “လူပင်သေ သော်ငြား၊ နာမည်ကတော့ မသေဘူး” ဆိုတာလိုပေါ့။ အဲ… နာမည်ဆိုးကြီး မသေဘူး ဆိုရင်တော့ ရှက်စရာ တော်တော်ကောင်းသား……….

လူတွေရင်ထဲမှာ ကိုယ်နဲ့ပတ်သတ်လို့ အကောင်းမကျန်ခဲ့ရင်တောင်မှ အဆိုးမကျန်စေခဲ့ဖို့ အရင်ကြိုးစားသင့် ပါတယ်။ ငါကတော့ လူတွေကို သိပ်ဂရုမစိုက်ပါဘူးလို့ သဘောထားခဲ့ရင်တောင်မှ ကိုယ်ရဲ့ Generationတွေ ကိုယ်ရဲ့ အရိပ်အမည်းကြီးအောက် မရောက်မိစေဖို့တော့ စဉ်းစားပေးကြပါ။

ကျွန်မကို လူတွေက အရမ်း Seriousထားတတ်တဲ့လူလို့ ပြောကြတယ်။ seriousထားလွန်းတာ မကောင်းပေမယ့် ကျွန်မရဲ့ အပြုအမူ အပြောအဆို အနေအထိုင်ဟာ ပေါ့ပျက်ပျက်နိုင်တယ်လို့ လူတွေမပြောကြတာကိုပဲ ကျေနပ်လှပါပြီ။ ပေါ့ပျက်ပျက်လူတွေကို ကျွန်မအရမ်းမုန်းပါတယ်။ သူတို့ရဲ့ပေါ့ပျက်တဲ့ အပြုအမူတွေ အပြောအဆိုတွေကြောင့် သူတပါး စိတ်ဒုက္ခရောက်ကြရပါတယ်။ ကျွန်မကိုယ်တိုင်လည်း အဲ့လိုလူမျိုးတွေကြောင့် စိတ်အနှောင့်အယှက် ခဏခဏဖြစ်ရလွန်းလို့ပါ။ ငယ်ငယ်ကဆို အမေက “ဆားမပါတဲ့ ဟင်းလို ပေါ့ပျက်ပျက်နဲ့” လို့ဆူတိုင်း ခြေဆောင့်ခဲ့မိတာ အခုတော့ အမေပြောတဲ့ ဆားမပါတဲ့ လူတွေတွေ့ရတိုင်း အမေ့ကို အတိုင်းမသိကျေးဇူးတင်မိပါတယ်။ သေသေချာချာ စဉ်းစားကြည့်ရင်တော့ ဆားဆိုတာ မီးဖိုချောင်မှာ ဈေးအပေါဆုံးအရာပါ။ အဲ့လိုဈေးပေါပါတယ်ဆိုတဲ့ ဆားမပါခဲ့ရင် အဲ့ဒီဟင်းဟာ ဟင်းကောင်းတစ်ခွက် မဖြစ်နိုင်တော့ပါဘူး။ လူတွေဆိုရင်တော့…….

"လူတိုင်းတန်ဖိုးရှိသော စကားကိုဆို၍ တန်ဖိုးရှိသော လူဖြစ်နိုင်ကြပါစေ။"

သစ္စာတရား ဆိုတဲ့စကားစုကို
ခပ်လွယ်လွယ်ပြောပြီး
အတွင်းစိတ်က ဖောက်ပြန်နေသူတွေ
လူတွေရဲ့ ယုံကြည်မှုတွေကို
သကာရည်လောင်းထားတဲ့ စကားချိုချိုနဲ့ ရယူပြီး
ပုပ်ပွနေတဲ့ အနံ့ဆိုးတွေ ပြန်ထုတ်ပေးနေသူတွေ
မင်းတို့ရဲ့ ညီစော်နံနေတဲ့
အရေခွံကိုခွာလို့
မင်းတို့ရဲ့ လိပ်ပြာဆီမှာ
မင်းတို့ ဘာသာ ဝန်ခံကြည့်လိုက်ပါ။
မင်းရှက်တယ်ပြီဆိုရင်တော့
ပြင်ဆင်ဖို့ အချိန်ဟာ နောက်မကျပါဘူး။
မင်းမရှက်တက်ဘူးဆိုရင်တော့
……………………………………
သေချာပါတယ်
မင်းဟာ လူ့ပြည်မှားရောက်လာတဲ့
ခပ်ပိန်ပိန် မြေခွေးတကောင်ပေါ့။

May 15

အပြည့်အစုံသို့

ချစ်သူ့ ဒိုင်ယာလော့စ်

ကို့ကို့… ကို ချစ်ပါသလား?
ချစ်ပါတယ် ကိုကိုရယ်။

ဘယ်လောက်တောင် ချစ်ပါသလဲ?
မိုးလောက်ကြီးချစ်ပါတယ်။

ဘယ်ထဲက ချစ်ပါသလဲ?
နှလုံးသားထဲက ချစ်ပါတယ်။

ဘယ်လောက်ကြာကြာ ချစ်မှာလဲ?
ကမ္ဘာတည်သ၍ ချစ်ပါ့မယ်။

နတ်ပြည်သွားရင်ကော
လိုက်မှာပေ့ါ

ငရဲပြည်သွားရင်ကော
လိုက်မှာပဲ

မြို့ထဲက အနှိပ်ခန်းတွေသွားရင်ကော
သွားရဲသွားကြည့်…. အကြောင်းသိရမည်။

အပြည့်အစုံသို့

Ideal Marriage

ဆရာသမားတစ်ယောက်ကပြောဖူးတာပေါ့…..
Ideal Marriage ဆိုတဲ့ စံပြုလောက်တဲ့ အိမ်ထောင်ရေးမျိုးရချင်ရင်တဲ့…..
သူပြောတဲ့ စံငါးခုနဲ့ ကိုက်ရွေးတဲ့
သူပြောတာက…..

1- loving each other
2- mature brain
3- proper income
4- good health and
5- acceptable both sides

1.loving each other
ဒါကတော့ရှင်းပါတယ်။ တစ်ယောက်နဲ့ တစ်ယောက် ချစ်မြတ်နိုးခြင်း၊ အပြန်အလှန် လေးစားနားလည်မှု ပေးခြင်းတို့ ရှိမှသာ ပျော်ရွင်စရာကောင်းတဲ့ အိမ်ထောင်ရေးမျိုးကို ရမှာပါ။

2.mature brain
ကိုယ်အိမ်ထောင်ဘက်က အတွေးအခေါ် ရင့်ကျက်တဲ့သူမျိုးဖြစ်မှသာ တစ်ယောက်နဲ့ တစ်ယောက်နားလည်မှု ကူညီမှုတွေ ပေးနိုင်မှာပါ။ စိတ်ဓာတ်မရင့်ကျက်တဲ့သူ တစ်ယောက်ဟာ ဘာကိုမဆို အလေးအနက်မတွေးတတ်၊ ပြဿနာတွေကိုလည်း မှန်ကန်တဲ့နည်းလမ်းနဲ့ မဖြေရှင်းတတ်တဲ့အပြင် အရာရာမှာလိုက်ပြီး သ၀န်တို စွပ်စွဲ ချက်တွေနဲ့ စိတ်အနှောင့်အယှက် ဖြစ်စေမှာမို့ ကိုယ့်ဘ၀အတွက် လက်တွဲဖော်မရဘဲ trouble maker သာ ဖြစ်နေမှာ သေချာပါတယ်။ ဒါကြောင့် လက်တွဲဖော်ရှာတော့မယ်ဆိုရင် သူဟာ စိတ်ဓာတ်ရင့်ကျက်တဲ့သူ ဟုတ်ရဲ့လားဆိုတာ အလေးအနက်ထား အချိန်ယူ စဉ်းစားသင့်ပါတယ်။ ချစ်သူဘ၀မှာတော့ သ၀န်တိုတာလေးကပဲ ချစ်စရာ၊ အိမ်ထောင်လည်းကျရော သဘောထားသေးသိမ်တယ်ဆိုတဲ့ ခေါင်းစဉ်အောက် အလိုလိုရောက်သွား တတ်တာကြောင့် ကိုယ့်ကိုယ်ကိုယ်လည်း မညာမိစေဖို့ သတိထားရင်း အမှန်အတိုင်း ချစ်သူကို လေ့လာကြည့်ဖို့ လိုပါလိမ့်မယ်။

3. Proper income
သင့်တင့်လျောက်တတ်တဲ့ဝင်ငွေ မရှိဘဲနဲ့ အိမ်ထောင်ပြုဖို့ မစဉ်းစားသင့်ပါဘူး။ တူနှစ်ကိုယ် တဲအိုပျက်မှာနေရနေရ၊ ထမင်းရည်ပဲ လျက်ရလျက်ရ ဆိုတာတွေက တကယ်တော့ လက်တွေ့ကျကျ ဘ၀ကို စဉ်းစားဆုံးဖြတ်မယ့် သူတွေအတွက်တော့ ရယ်စရာ ဟာသတစ်ခုပါဘဲ။ သိုးဆောင်းစကားပုံ တစ်ခုအရဆိုရင်တော့ မီးဖိုချောင်မှာ ပေါင်မုန့် မရှိတဲ့အခါ အချစ်ဟာ ပြတင်းပေါက်က ထွက်ပြေးမှာပါ။ ဒါကြောင့် ကိုယ့်အဆင့်အတန်း၊ ကိုယ့်အခြေ အနေနဲ့ လိုက်ဖက်တဲ့ ၀င်ငွေမျိုး ချစ်သူကရှာပေးနိုင်ရဲ့လား ဆိုတာလည်း စဉ်းစားစရာပါပဲ။

4. Good health
ပိုက်ဆံလည်းချမ်းသာပါရဲ့ ပညာတွေလည်းတတ်ပါရဲ့ သိပ်လည်းချစ်ကြပါရဲ့။ ဒါပေမယ့် ချစ်သူက ရှူနာရှိုက်ကုန်းလေး ဆို ဘယ်ဖြစ်မလဲ။ ဒါကြောင့် ရောဂါသည်လေးမရွေးမိအောင်လည်း သတိထားရမှာပေါ့။

5. acceptable both sides
လူကြီးမိဘတွေက အမြဲတမ်းမှန်နေတာ မဟုတ်ပေမယ့် ကိုယ့်ထက်ပိုပြီး အတွေ့အကြုံ ရင့်ကျက်တာတော့ ငြင်းလို့မရပါဘူး။ တကယ်လို့ လူကြီးတွေက လက်မခံနိုင်ဘူးဆိုရင် ဇွတ်ရှေ့မတိုးဘဲ ဘာကြောင့် သဘောမတူ နိုင်သလဲဆိုတာ ခေါင်းအေးအေးနဲ့ စဉ်းစားဖို့လိုပါလိမ့်မယ်။ နှစ်ဖက်မိဘ သဘောကျတယ်ဆိုရင်တော့ OK ပေါ့။

No one is perfect တဲ့ ။ ideal marriage ရဖို့အတွက် အထက်ကအချက်အားလုံးနဲ့ ကိုက်ညီရင်တော့ အကောင်းဆုံးပေါ့။ ဒါပေမယ့် အားလုံးပြည့်စုံဖို့ မဖြစ်နိုင်ဘူးဆိုရင်တော့ နည်းနည်း အလျော့အတင်းလေး ရှိရမှာပေါ့နော်။
ဒါဖြင့် တို့တွေငယ်ငယ်က စာမေးပွဲဖြေသလိုမျိုး အမှတ်ပေးကြည့်ရအောင်
အမှတ်ပြည့်က တစ်ရာဆိုရင် အချက်ငါးချက်ဆိုတော့ တစ်ခုကို နှစ်ဆယ်မှတ်စီပေါ့
တစ်ခုဆို 20 (အမှတ် တစ်ရာမှာ 20 ဆိုရင် စာမေးပွဲကျပြီပေါ့)
နှစ်ခုဆို 40 (အင်း . . . အောင်မှတ်ရယုံလေးဆိုတော့ သိပ်မကောင်းသေးဘူးနော်)
သုံးခုဆို 60 (သိပ်တော့မဆိုးဘူးနော် ငယ်ငယ်က ဆရာတွေ ပြောသလို ဆိုရင်တော့ ဆက်လက်ကြိုးစားပါပေါ့)
လေးခုဆို 80 (ဂုဏ်ထူးထွက်နေပြီဆိုတော့ သင့်တော်တဲ့သူလို့ပြောလို့ရတာပေါ့)
ငါးခုလုံး ဆိုရင်တော့ အမေ့ကိုသာ တစ်ခါတည်းပြောလိုက်ပေတော့

ကဲ… အားလုံးပဲ ကိုယ့်ဘ၀အတွက် အကောင်းဆုံးလက်တွဲဖော်ကို ပိုင်ဆိုင်နိုင်ပါစေလို့ ဆုတောင်းပေးလိုက်ပါတယ်။

ပီတိ (စိတ်ပညာ)

အပြည့်အစုံသို့